नहूम 1
Awadhi Bible: Easy-to-Read Version
1 इ नीनवे क बारे मँ एक ठु दुःखद समाचार अहइ। इ किताब नहूम क दर्सन क किताब अहइ। नहूम एल्कोस स रहा।
यहोवा नीनवे स कोहान अहइ
2 यहोवा ईस्यालु अउर प्रतिसोधी परमेस्सर अहइ।
यहोवा बदला लेत ह।
यहोवा बहोतइ कोहान अहइ।
यहोवा आपन दुस्मनन क खिलाफ बदला लेत ह।
उ आपन दुस्मनन पइ कोहात रहत ह।
3 यहोवा धीरा राखत ह।
मुला उ बहोतइ सक्तीसाली अहइ।
यहोवा अपराधी लोगन क सजा देत ह।
उ ओनका आजाद चला जाइ नाहीं देइ।
लखा, यहोवा दुट्ठ लोगन क सजा देइ आवत ह।
उ आपन सक्ति देखॉवइ बरे चक्रवात अउर तूफानन क काम मँ लिआब।
बादर ओकरे गोड़न क नीचे धूरि क समान अहइ।
4 जदि यहोवा सागर क घुड़कइ तउ सागर भी झुराइ जाइ।
उ सारी नदियन क झुराइ सकत ह।
बासान अउ कर्मेल क हरी-भरी भुइँया झुराइके मरि जात हीं।
लबानोन क फूल मुरझाइके गिरि पड़त हीं।
5 यहोवा क अवाई होइ
अउर पहाड़ डर स कँपिहीं
अउर इ सबइ पहाड़ियन टेघराइके बहि जइहीं।
यहोवा क अवाई होइ
अउर इ धरती डर स काँपि उठी।
इ जगत अउर जउन कछू एहमाँ अहइ
जउन जिअत अहइ, डर स काँपी।
6 यहोवा क महाकोप क मुकाबला कउनो नाहीं कइ सकत,
कउनो भी ओकर भयानक कोप नाहीं सहि सकत।
ओकर किरोध आगी क नाई धधकी।
जबहिं उ पधारी तबहिं चट्टानन चटकि जइहीं।
7 यहोवा संकट क काले मँ उत्तिम अहइ।
उ सुरच्छित सरन अइसे ओन लोगन क अहइ जउन ओकरे भरोसे अहइँ।
उ ओनकर देख-रेख करत ह।
8 मुला उ आपन दुस्मनन क पूरी तरह बर्बाद कइ देइ।
उ ओनक बाढ़ क तरह बहाइ के लइ जाइ।
अँधियारा क बीच उ आपन दुस्मनन क पाछा करी।
9 का तू पचे यहोवा क खिलाफ सड्यंत्र रचत अहा?
उ तोहार पचन क अंत कइ देइ।
फुन अउर कउनो दूसरी दाईं कबहुँ यहोवा का खिलाफत नाहीं करी।
10 तोहरे पचन्क दुस्मन
अरझ गए काँटन स बर्बाद होइहीं।
उ पचे झुरान घासे जइसे
हाली ही जरि जइहीं।
11 हे अस्सूर, एक मनई तोहसे ही आवा अहइ।
जउन यहोवा क खिलाफ सड्यंत्र रचेस अउर पापे स भरी सलाह दिहस।
12 यहोवा यहूदा स इ सबइ बातन कहे रहा:
“अस्सूर क जनता पूरी सक्तीसाली अहइ।
ओकरे लगे बहोत स फउजी अहइँ।
मुला ओन सबन्क काटिके लोकाइ दीन्ह जाइ।
सबन्क अन्त कीन्ह जाइ।
हे मोर लोगो, मइँ तू पचन्क बहोत स कस्ट दिहेउँ
मुला अब आगे तू पचन्क अउर कस्ट नाहीं देबउँ।
13 अब मइँ तोहरे पचन क काँधे स उ जुआ उतारि देब।
तोहार सबन्क जंजीरन जेनमाँ मँ तू पचे बँधा अहा
मइँ अब तोरि देब।”
14 हे अस्सूर क राजा, तोहरे बारे मँ यहोवा इ आदेस दिहस ह:
“तोहार नाउँ लेवइया कउनो भी संतान न रही।
तोहार खुदी भइ मूर्तियन अउ धातु क मूर्तियन क मइँ बर्बाद कइ देब
जउन तोहरे देवतन क मन्दिरन मँ रखा भवा अहइँ।
मइँ तोहरे बरे कब्र बनावत हउँ
काहेकि तोहार अंत आवति अहइ।”
15 लखा यहूदा।
लखा हुआँ, पहाड़े क ऊपर स कउनो आवत अहइ।
कउनो हरकारा सुसंदेस लइकि आवत अहइ।
लखा उ कहत अहइ कि हिआँ पइ सान्ति अहइ।
यहूदा, तू आपन खास छुट्टी क दिन मनाइ ल्या।
यहूदा, तू आपन मन्नतन मनाइ ल्या।
अब फुन कबहुँ दुर्जन तोह पइ वार न करिहीं अउर उ पचे फुन तोहका हराइ न पइहीं।
ओन सबहिं दुर्जनन क अन्त कइ दीन्ह ग अहइ।
Awadhi Bible: Easy-to-Read Version. Copyright © 2005 Bible League International.